___________________________________________________________________________________________________
Hofbräuhaus in der Tao Jiang Lu am 29. Mai 2008
A kurzae Berichd fom Mai-Dreff lezdn Dunnerschdich: Wie ongekuendichd, fond unnae Mai-Dreff im neuen Hofbraehaus in dae Daodschiang (Taojiang) Lu schdodd. Bei ideolen Dembaeraduren semmae draussn im Biergadn gebliem un homs ned bereud. Die Lufd wor schoe lau, un die bor frueha Moskitos hodmae midm Wenxiang bold im Griff.
Ich hob 32 Leud gezeld, es koenna oba a a boae mer gewesn sei. Dae Eberhard wor leidae es lezda mol daebei. Er un die Ruth gen zuruegg in die Heimod un organisiern im Londkreis Fuerth aen "Ehemolicha Schonghai Frong-Dreff"-Dreff. Gud njus kam fom Ralf (unnae Frongn-Fodogrof un Wochnenddrib-Organisierae) un dae Grisdina: Die zwae koenna doch nuch a Joae in Schonghai bleib.
Es Bier wor leggae, es Esn gemischd (die Schweinshaxn wor auf jedn Foll laedscherd). Uem holbae zena gabs a Bremiere (worscheinlich in gonz Kina): Zum erschnd Mol hommae es Frongn-Lied im Frein gsunga - des wor fei schoe!
Do ich desmol ned bis zum Schluss do wor, waes ich ned genau, wer dae "hadde Kaen" wor. Dae Joachim Ludwig un dae Stephan Greif muessdn auf jedn Foll dobei gewesn sei.
Den naexdn Dreff moch mae in dae lezdn Juni-Wochn. Genaua Zeid un Lokaeischn kumma nuch.
___________________________________________________________
Hofbräuhaus Pudong am 29. Februar 2008 (Bilder gibt's hier)
Es woae widdae schoe, fiela fo Euch lezdn Freidich im Hofbrauhaus zu dreffn. Obwol a boae Leud ogsochd hom, hob ich zwischendorch mol 35 Leud gezeeld.
Asn un Dringn hod onscheinend widdae gemunded, un fuaes kuldurella Wohl hommae ja unnae Frongn-Lied. Midm Schonghaier Frueling foae dae Dueae, hod donoch "Im Maerzn dae Bauer" a schoe gebosd. Uem zwoelfa woae don Gebuaedsdoch fom Bernhard (a Freund vom Erik), un miae hom noduerlich a Schdandla fuae na gsunga.
Dae hadde Kaenn woaen desmol dae Lodda, dae Dscho, die Sabine, dae Stephan un ich. Mae senn naemlich aufm Hemmwach nuch in die Hongmei Lu nein El Cubano, fo wu aus ich uem holbae Dreia aufgebrochn bin. Die Sabine un dae Stephan woaen nuch laenger do - des woae donn dae uldrahadde Kaenn.
_________________________________________________________________________
The Bund Brewery am 29. Januar 2008 (Bilder gibt's hier)
Obwols om Diesdich frue gschneid hod un omd die Schdrossn deilweis faeeisd won, homs fei drozdem 22 woggaera Schonghai-Frongn zu dae Bund Brueri gschoffd.
Un ich glaeb, es hod kennae bereud. Es Esn woae guaed un bei aem Diskaund fo 50% a ned deuae. Es frisch gebrauda Biae is gflossn - die erschd Rund auf Kosdn fo dae Brueri - un mae hom es Lochae, Dungla un Weizn genossn.
Noduerlich hommae wieddae es Frongn-Lied gsunga, woruebae dae daiwonesische Waerd fo dae Brueri gonz begeisdaed woae. Dae hadde Kaen won desmol dae Dobias un iech - mae senn donn so uem esa frue Richdung Heimod.
Ich wuensch Euch oella a schoens Fruelingfesd un "Gungschie-Fazai" im neun Roddn-Joae! Wa wie ich a Rodd is (wenndae 1984, 1972, 1960, 1948 ...geboaen seid), dam gab ich beim Februar-Dreff a Biae aus.
______________________________________________________________________
Lamesa am 11. Dezember 2007 (Bilder gibt's hier)
Schoe wors gesdaen omd widdae mid Euch. Laud meinae Schdodisdigg worn mae 29 Leud im adfendlich gschmuegdn La Mesa. Wies aussied hom die Lebkuchn un dae Gluehwein gemundet, un es Esn wor a ned schlechd. Beim Bidburchae hommae onscheinend a Fasla (30 Liddae) alee lehr gemochd.
Noch meinae glenna Schonghai-Frongn Schdodisdigg (wifil mae sen, wu die Leud wona, welcha Vornoma merfoch vorkomma, usw.) kam dae dradizionelle Hoehebunkd, naemlich es Frongn-Lied, desmol mid einae zusaezlichn Schonghai-Schdrofn (Dexd: siehe undn). Un weil mae des so schoe gsunga hom, hommae a boae Minudn schbaedae gleich nuch Weinochdsliedae gsunga (fuae viela wor des fileichd es aschda Mol seid Joan, daessa widdae mol a Weinochdslied gsunga hom). Wen sich dobei dae e oddae onnae o sei Kindheid un sei Leud erinnaed hod, no woae des doch a feina Soch.
Dae hadde Kaen woae bis holbae dreia do, un desmol worich a daebei (un bin deswachae heid a bissaela mueaed).
Ich wuensch Euch oella a froelicha Weinochdn unaen guaedn Rudsch ins Neua Joae!
_______________________________________________________________________
Hofbraeuhaus in Pudong am 22. November 2007 (Bilder gibt's hier)
Gesdaen woae widdae wos los im Hofbraeuhaus! Laud meinae Schdodisdig woaen mae 40 Leud, wenmae die Gesd fom Oliver un Lodda midzeld - un des, obwol a boae ned kumma sen, die sich ongemeld hom.
Noduerlich hommae widdae es Frongn-Lied gsunga, un desmol mid Begleidung fon dae Zwae-Mon-Baend. Ich muss soch, a capella klingds fosd nuch bessae, weil mae unnae eichenes Dembo sing koenna.
Dae Joachim Ludwig (da haessd waerglich so mid Nochnoma) hod schoena Frongn-Dreff Schonghai Aufglebae moch los un sa gesdaen omd midgebrochd. Mae hom schbondan beschlossn, daesma sa fueae 10RMB bro Schdueg faekoefn, un daesdae Alex es Gald fueae a Gril-Badi naexdes Fruejoae mid unnera Fomilien aufhebd.
Ols ich uem ensa ford bin, hob ich nuch des beigfuechda Bild fom "Hadn Kaen" gemochd. Die onnera Bildae koendae in a boae Doch auf dae Webseid sa.
_______________________________________________________________________
Papa's Bierstube in Hongqiao am 30. Oktober 2007 (Bilder gibt's hier)
Dongkschoe o oella, die om Diesdich widdae so zolreich kumma sen. Laud mainae Schdodisdig woaen mae desmol 33 Leud.
Hiae es dae Berichd fueae die, die ned konndn:
Miae hom uns noch longa Zeid widdae mol im Gruendaelokol Baba's Bierschdum gedroffn. Obsoludes Heileid woae die BauerBoind-Bresendaeischn fom Erik, wierae unnae Frongn-Floggn in Loae om Mee mid Frongnwei un Biae gedoeft un nochaed im Mee geweihd hod. So en Humoae haed mae Diae gor ned zugedraud, Erik. Dongkschoe im Noma fo oella, die einen wunderboren Schboss hoddn. Noduerlich hommae a widdae es Frongnlied gsunga - die Lufd aus unnaerae Kelen woae frisch und rein. Kulinarisches Heileid woae es Jaechaeschnizl mid Schbazlich, obae die onnaen Sochn hom a guaed gschmeggd.
Besdae Beweis, daes sich beim Dreff widdae a boae neua un olda Frong in Schonghai gfunna hom, is die Dodsoch daess die lezdn aeschd uem dreia aus Baba's Bierschdum nausgfunna hom (onscheinend kon Fraengisch-Biljad-Schbieln a suechdich moch …)
_______________________________________________________
Hofbraeuhaus in Pudong am 29. September 2007 (Bilder gibt's hier)
Dongkschoe o oella, die gesdaen omd kumma sen. Laud mainae Schdodisdig woaen mae 35 Leud inglusife unnaerae Gesd. Un wies aussied, hom oella aen Haufn Schbos kobd.
Kuaezae Berichd fueae die die ned kum konndn:
Es Ogdobaefesd-Biae is gflossn un es Weisbiae a. Mei Schweinshaxn woae so groaess, daess ich sa fosd ned gschoffd ho. Do brauchdn mae donn aen Himbeaegeisd zum Faedaun. Die Noeaenbeichae Labkuchn hom gschmeggd, un donoch hommae donn des Frongnlied (ohne Kobelln) gsunga. Do him die onnera Gesd im Resdaurand fei schoe geguggd. Dae hadde Kaen woaen 8 Leud, un miae sen uem esa frue ausm Lokal.
Heid omd geds zum WM-Endschbiel. Druegg mae unnera Madlich die Dauma, daessa gewinna.
________________________________________________________________________